Ma be xêr di, sarê maê Dêsımi! Nae ra dıma ez ebe nustanê xo ra, Rocnamê Vengê Sarê Dêsımi “Tunceli Halkın Sesi” de benane meymanê sıma.
Çıra Almanya ra, jüyo de Erzınganız naca de bınusnero?
1986 ra nat ze taê albazanê xo, ez ki zon u kulturê ma sero gurinane.
Ma ra raver pilanê ma, ebe nuste (yazı), ma rê thawa nêverda, ma xo ra raver kundê (tarixê) xo ra, zonê xo ra morım mendime. 28 serrio zonê ma sero, kulturê ma sero xeylê kar kerd, xeylê çi musane, xeylê çi di; wazon ke na zanais u diyaişê xo sarê xo re bunşnine, salê xort u azebê ma thawaê de ma xo vira mekerê.
Saro bin, komê siyasetê saranê binu, kes xortanê ma, gencanê ma, xo dıme ra meberê, serba xo zay mekerê, serba xo megurenê, azê ma ki xo vindi mekero. Xortê ma, azebê ma ki raurzerê serba zonê xo, serba kulturê xo, serba welatê xo bıguriyerê.
Ma naca Almanya de 10 serri têdıme ra Şênatiya Kıtabu ebe namê „Veyvê Kıtabu“ arde pêser. Kıtabê ke zonê ma de veciyê yan ki kıtabê ke ma sero zonanê binu de veciyê; ma i kıtabi day nas kerdene, saiya nae ra xeylê mordemu zonê ma sero kıtabê ilmi veti.
Ma ita (Almanya de) pêseroki (dergi) veti. Ni pêseroki Zazaki (Kırmancki) Almanki u Tırki vetêne. Zonê ma de kılami (şiir) , lawıki (Türkü) day arê, kerdi pêseroku. Almanya u Ewropa de Zonê ma raver şi, hama çı hêf ke welatê ma de zonê ma, zerrê sarê ma de peyser şi, uca sarê ma serba zonê xo, nêerzeno xo ver.
Ez gegane ebe zonê ma, gegane ki ebe Tırki Rocnamê „Vengê Sarê Dêsımi“ de na çengê xo de sıma rê nusnenane.
Yê mı ki par 2013 de Estamol de Vılaxanê Fami (Fam Yayınları) de ju kıtabê mı veciya. Name kıtabê mı zonê ma de „Ebe Vatena Tırki Kıtabê Musaena Zazaki, Türkçe Açıklamalı Zazaca Öğrenme Kitabı“, Dêsım’de Rotisxanê kıtabu Baran (Tunceli Baran Kitabevi) de yeno diyaene. Na§e ra dıma sıma ki uca çip berê, uca berze ra xo ver, zonê xo re wayir veciyerê.
Haydar Şahin
01.03.2014
