Gağan namê ju asmeo. Na asme de juyo de kokım u ciniya xo ra çêwu ke fetelinê/cêrenê coke ra vanê, Khalo Gağan yanki Khalê Gağani. Yani Kokımê Gağani
Khalo Gağan hesabo khan ra 30 yan ki 31 de (hesabo newe ra 12-13. 01. her serre de ) Bıçıke pojina. Ju darık kenê zerre/miyande na bıçıke. Bıçıke kenê hurdi, qede wayirê çêyi, qede mali, qede mıymani, juki çê de qede her keşi vecenê. A sewe de, darık qede kam de ke vecina, a serre rıskê di werino. Yani u darık eke qede meyman de ke veciyo; a serre, sarê i çêi rıskê mıymani ra serre viarnenê ra/raviarnenê.
Darık ke kamci qede de veciya; Nuxriye(teur pilê domanu) çêi darık cêno beno erzeno gora mali yanki erzenê axure. Eke darık ke est zerre axure yanki est zerre gome mali vanê; “Sanıko Suvan, Memıko Gavan” Sanıko Suvan, Memıko Gavan ni hurdemena wayire maliye.
Hama ez hin zanenane ke Sanıko Suvan wayirê çêyiyo, Memıko Gavan wayirê mal naxıriyo. Nine mordem kokımu ra pers kero.
Roza ke bıçku pozenê, a roze bıjereku, daniu ki pozenê.
Khalo Gağan de roce necêrino, qurban sarey nebırnino. Roca de jiargiye niya.
Ebe kefu kay vêrena ra.
Dewê Pulemuriye ke nejdiye(verba) dewa (Bağ: Mamaxatune(Terzan) ra nejdiya) ma derê. İ dewu ra Bardağçiye ra Musaê Uşenê Doy u Hemedê Weliye Mirzay ra kay kerdenê. Gegane ki lacê Ali Qemeri yani tornê Aliye Memişi kay kerdenê. Hemed hao dewa Têrzani Pune dero. Musaê Uşenê Doyi ki hao Erzıngan dero. Qemer 2006 şi rest heqiya xo. Qemer xalê mı bi.
Mordemo ju kuno pırenê(Thunê/Thılqê) Alıki; na mordemo ke beno khal(Alık) manıke unceno sare xo. Dustê çımu, juki dustê pırnıke de manıke qule kerina, ora dıma ki uncina sari ser. Cêra ki hêrdisê nano riyê xo vera, beno juyo de kokım.
Fatıke kıncanê xo kena pay, leçege erzena xo ser, miya xora ki şale gıre dana, cor de ki tac nana sarê xoser. Fadıke gênca mêrde/mêrıkê xo kokımo. Alık u Fatıke ra sonê çêwu, ron, thoraq, ardu, çay, seker danê arey. Eke na çimi ke da arey, venga xortu çênu danê, benê pia pozenê, pia ki wenê-sımenê.
O ra dıma ki kılamu, lawuku/deyru vanê. Rozê-dı roci hini wenê, sımenê kaykenê. Roca hireyine eke çimi vêşeri mend, i çimi benê çêwo ke teur feqıro danê dinê.
Alık’be Fatıke ra xo ke pışt têra, eke verende şi çê kami çêver danê pure, wayirê çêi çêver/kêber keno ra. Alık u Fatıke ra verba arey(ayre) kaykenê. Ju xort ki, çım verdano cinia khali, her geim de reye qurçık beno Fatıke re. Seke xort qurçık beno Fatıke re, Khal hêrs ra sono xort ser ke puredo. Uşıra xo keno ra rast dano xorti re. Xortıki hêrs beno dano Kahli ro(Alıki ro) Khal pa sono(Bolmıs beno), gıneno hardı ro. Ciniya xo ki dest kuna pa ke hasar bo, khal hasar nebeno. Ciniya Khali ero ağwe(auke) cêrena, eke riye Alıki ra kuyo sale Alık hasar bo. Hama ciniya Alıki auke/ağwe nevinena. Teseliya xoke kuna sona palê serê Khali de kena ra/ corde mıji verdena ra kokımı serke va hasar bo.
Ebe na kay Alık beno hasar unciya ebe ciniya xora piya kılamı,lawuku/deyru vanê. Wayire çêi/kêi halê xo ser ano çi dano dinê.
Asma Gağani de bıray kune ra rau sonê diarê waanê, zeyianê xo, dinê re çimi tey benê.
Eke bıra sono diarê waa u zeyianê xo, eke dara/halo rınde derê, cıre zern beno, eke halwaxtı rake zaf rınd niye, a asme de; gozu, qağu, bosmeci, bulxır, den tey benê.
Vanê; Zeyia çêia çımê xo ma dero. Heqa daê ki, ma u piê daê ki cian (emeg) do, mao ke inê bê sem, bê bare meverdime.
.
Vatoği:
Yemê Têrzani ra; İmamê Baği, İmamê Suzaliye u Xaskere, Bardağçiye ra torna Aliye Memışi Ejma, Uşenê Baği u xanıma xo Zerde ra.
Nustoğ: Heyder Şahin
