(Na Zu Sanıka „vaceê“ (bu bir öyküdür.)
QESEYKERDENA TELEFONÊ (Vengêteli) SERZAN U FİROZE
- Serzan, Firoze rê têlefon keno ra. Têlefon dano pıro, vano, zırrrrrrrrrrr. Firoze vana,
- Alo, tu kama?
- Ez Serzanane. Ez ke pers bıkerine; Tu ki Firoza?
- Hiya, ez Firozane!
- Zaf rınd, ez biyane sa ke nıka to de qesey kenane. Wazon ke to de jü vajiyaişê (röpertajê) bıkerine.
- Çınay sero qesey kenime?
- Halê ma sero.
- Çıra ke? Halê ma rê se biyo ke?
- Pers bıke ala se biyo! Mı ki qısawete (Merax) kerd.
- Ma ra taê vanê ma Tırkime, taê vanê ma Kurdime, taê vanê; nê, ma xo sero jü sarime.
- Bıra, u çiyo de zaf aseno (reeto): ma ne natênu rayme, ne ki dotênu rayme. Mıliyetçiyê (şarperestê) hurdımine ki wazenê ma roquletnê. Ma Tırki peydêna musayme, Şarê ma xona zonê Kurdu ki nêzaneno. Çıtur beno ke ma Kurdime, yanki Tırkime?
Zu mordem ma ra, zu ki dotênu ra; eke ni dı mordemi zonê xo zanê, bıngê zonê xo rınd zanê, hama nine ra kes ke zonê dotêni nezano, u tawi na mordemi ardi têlewe, her zu ke zonê xo qesey kerd, dotêni zonê natêni ke nezanıt, u tawi nı dı zonê.
Na dı mordemi ebe zonê hirêyine şikinê zubini de qesey kenê. ni zoni dı zonê, wahirê na zoni ki dı sarê.
Nia xonde her çi zalalo. U çiyo ke i cêreni vanê, „sıma Tırkê“, corêni ke vanê, „sıma Kurdê“, u pêro zuro bêbıngeo, çiyo de thırrrr – vırrro. Gos qesanê henênu ser menê. Zonê xo domananê xo, tornanê xo musnê ke salê vindi meberê! Zav u jêçê sıma ke zonê xo zanıt, zur u zorê ê binu phıstınê dine de maneno. U tawi kes nêşkino xort u azebanê ma bıxapno.
Yê ma aqılê ma sarê ma dero. Ma zanime ke çıxae zonê ma de taê çekuyê ma şêro ro zonê Kurdu, Zonê Farsu, Zonê Taciku, Zonê Almanu, Zonê İngilizu, hama yê ma ki xo sero zu zono. Sarê ma ki xo sero zu saro de khano.
Zanon ke halê ma yamano. Çı vajine ki, ma taine re zor yeno. Ez vanane, mevazerê, feko hes bê. Ma pêro pia derdê xo rê derdman bime, berjime xo ver, kamiye (kimlik) u zonê xo re wayir vecime. Yê her sari nuştekarê (yazar) xo, roştberê (aydın) xo; çı ke vanê, sarê xo ki gos nano ro cı. İyê ke na zonê ma qesey kenê, pêro pia zu bê. Ma tek u teyna ebe na rae, ebe na rêçe xeleşinime ra.
- Firoz, tu berxudar be! Tu zaf wes qesey kerd, zaf çiyo de hewl vat, raa ma, ma rê tenêna kerde ra, sewa tariye de biya roştia ma.
Mı nia xeylê cao düri ra to rê telefon kerd, tu ki zaf xanımêni kerde, dayağ da ma, dayağ da sarê ma.
- Tu ki berxudar be! Mı çı ke zanıt, çı ke şikiyane, çı ke aqılê mı bırrna; mı a qesa vate. Şikinane zaf çiyo de kılmeko de bin vajine: halê ma na dina de yê her mıleti ra zaf zaf pêrsano. Ma derdê xo nêgureto, ma çarê xo de nia nêdanime, saro ke se qat ma ra ravêrio, dine re vozenime, dine re berbenime. Nu ki mı rê zaf tamase yeno.
- Mı rê ki ze vatena tu yena, uncia ki tu tenê dayağ da ma, dayağ da mı. Gumanê mı hini esto ke , ma ki gıran gıran yenime ra xo. Roze sarê ma ki zerrê saranê dina de caê xo cêno. Hini guman kenane, hin ğeyal kenane.
- Sarê ma xo berz u baqıl vêneno. Eke baqılê, çıra peyniya pêroyine de mendime? Çıra radonê ma, rocnamê ma, têlevzonê ma çinê? Çıra yê Tırku zaf têlevzoni, radoni, rocnamey estê, yê ma çinê? Çıra yê Kurdanê Tırkiya 10 tenu ra jêde têlevzonê xo estê yê sarê ma zu têlevzonê xo çino? Çıra nae xo ra pers nêkenê?
Xonde ke son u sodır xora Tırk vanê, Kurd vanê. Ebe na qesanê thalu xo xapnenê, serru ebe na hal ra viarnenê ra.
-Tu raşt vana, hama naê bini ma ebe halê ma nêverdanê, çetıniya ma ki uca dera.
Ez wazon to ra çiyo de bin pers bıkerine! Zu herê de sımao Alos bi, u her xona vınetio?
- Hiya, herê mao Alos vınetiyo , zaf bar nêkon, tenê biyo kokım. Yê mı karê mı zafo, hama karê xo ebe herê xo nêdon kerdene.
- Ma, hero Alos nıka se keno? Hero Alos tenê zonê ma museno! Nıka zu çekuye muso. Hero Alos dım dano we, vano, „Zonê Sıma ke Bi Vindi , Sıma ki Benê Vindi.“ Nao usar ama, Hero Alos dım dano we, zırreno, çairu de çereno, rocê di biyê şêni.
- Ez vanane, tu zaf wes be! Mı ewro tu zaf qefelna, ez wazon ke, to ra xatır bıwajine.
- Ewro tu se kena? Teww, mı va çı pers keno. Na têlefonê tu ke qediya, xorê sonane lewê herê xoyê Aloşi. İ wenca ra çıraynon.
- Xanım Firoze, roza rınde!
- To rê ki roza rınde, Serzan!
- Bımane weşiye de! Hatan reyna
- Hiya, hatan reyna, her kes xo de rınd nia dero.
Na nuste verba keşi nênusto! Serba zonê xo u serba hedıria wendoğu nusto.
Heyder Şahin
