REW RA HALO MAO VERÊN/ REU RA HALÊ MA SENÊN Bİ?

55 serri ra ravêri xona doman bime, dewa ma de, dormê dewa ma de dewanê binu  pêroyinê de, her dewe de zunê ma qesey biyene. 

Dewanê ma de gıraniyê nê, dewê ke yê sarrê ma bi, pêro zonê ma bi, zonê ma qesey biyene.  Caê zonê ma berz bi, gıran bi, Qedru qimetê zonê ma zaf bi.

Dewanê ma de Tırki çine bi, Juyo ke Tırkki  qesey kerdene, cı re zaf diyene, herkeş  vatene, ni de, naê de edeb çino (terbiye) verba pilanê xo, zerrê sarê xo de zonê xo qesey  nekeno. Nesermayin (o/a).

Rew ra ma ke şiyene Wendisxane (Mekteb)  a roze sınıfe de lete Zazaki, lete ki Tırki qesey kerdene. Bıngê zonê ma kip/çip bi. 

Hama seke biyene sunde, Wendisxane qediyene, endi Trıki ki uca de qediyene. 

Hama dıme ra ebe serru caê zonê ma bi ra vindi şi. Caê Zazaki de Zonê Tırku ca guret.

İ Serru de dıme ra Khalo Gağan amênê her dewe ra dı-hirê mordemu hem dewa xo de, hem ki şiyene dewanê binu, çêu ra denê arey. Rozê Xızır amênê, eke Rozê İmamu ke amene, pilu roze guretene, domani juyo ke pil bi inê ki 2 roji yan ki 4 roji roze guretene. Keşi sero  zor çine bi.

Pianê ma, ma ra vatene cigera mı; so thamê des u dı İmamu bıhêrne biya. Maanê ma ki vatene; u domano, neşkino çimi biaro, nezano çiyo rınd bıhêrno, layiki xapnenê, çiyo poyaê danê cı. Tı so çêyi re tamu, susê lamba u çiê bini bıhêrne biya.

Piê ma vatene; cenki, nıka lerze ra seker çino, suse lambe çino. Ae ki vaten layik şero, seker u suse lambe biaro. Thamanê des u dı İmamu ki tu bıhêrne biya.

Na ebe hal ra welat de gırania ma biye! Gıraniya Zonê ma u gıraniya Kulturê ma biye. Nıka ki gıraniya saranê binu ma sere wa. Bınê na gıraniya sar de nıqenime, neşkinme bın ro şerime.

Mao ke barê sari xo ser ra berjime, ebe xo dewa xo re weyir vecime.

 Nıka nê zone ma, na ki gırania ma menda. Wendkarê delali, sıma sevanê? Naê ra dıma ma se benime?

Xona nemerdime, hama neweso gıranime, uncia je veri benime wes? Unciaya je veri yenime ra xo?

Sıma sevanê?

Sıma ke vanê; ma nemırenime u tawi ma pêro pia  berjime xo ver, uncia je veri ma her çiyê xo re wayir bime, hekene berze xo ver, zonê xo qesey bıkerê, Zazaki(Kırmancki) de  Wendisxane bıwazerê.

Ma Awropa de taê albazanê xo ra pia, dıme ra taê bini amay reşti ma, 1983 de name Ayre/Are (değrmen) ma zonê xo de peserroke vete,daê dıma ra Piya vete. Piya ra dıma ra Ware vet, Malatya de Miraz vet, nıka ki Diyarbakır de Zazana, estamol de MA vecina. Ma zonê xo de xeyle Peserroki (dergi ) veti! zonê xo ravêri berd, nıka dori , na kar endi welat de ki caê xo bıcêro. Sıma ki uca berze xo ver, xo ravêri berime.